Тыдзень філалогіі
24.02.2020Тыдзень філалогіі
Як не любіць нашу родную мову, такую мілагучную і напеўную?! Як хораша і каларытна гучаць словы па-беларуску! Хто паспрабаваў смак беларускай мовы, той ніколі яго не забудзе.
З 17 лютага па 22 лютага ў нашай установе адукацыі праходзіў Тыдзень філалогіі. У рамках тыдня настаўнікамі былі праведзены мерапрыемствы, якія садзейнічалі развіццю інтэлектуальных і творчых здольнасцей, пашырэнню кругагляду навучэнцаў, выхаванню любові і павагі да роднага слова. На працягу тыдня вучні ўдзельнічалі ў цікавых падарожжах, займальных віктарынах і інтэлектуальных гульнях, акцыях, турнірах.
Дэвізам Тыдня сталі словы “Мова родная – мова модная!”. “Будзь у трэндзе – размаўляй па-беларуску!” – гэты выраз часцей за ўсё гучаў сярод навучэнцаў падчас тэматычнага Тыдня. Школьнікі нават выпраўлялі памылкі адзін у аднаго ў вымаўленні беларускіх слоў. Гэта сведчыць аб тым, што наша моладзь не губляе сваіх каранёў, не цураецца сваёй спадчыны, а імкнецца яе зберагчы, захаваць сваё роднае слова.
17 лютага адбылося адкрыццё тыдня філалогіі. На перапынках гучалі беларускія песні.
18 лютага для вучняў 8-10 класаў праведзена інтэлектуальная гульня “Як ты дорага мне, мая родная мова”. Вучні прадэманстравалі свой інтэлектуальны патэнцыял у конкурсах «Культурная спадчына», «Песняры Беларусі», «Таямніцы мовы», «Мовазнаўца», «Жанры літаратуры”. У канцы гульнi вучнi прыйшлi да высновы: «Чалавеку трэба ведаць розныя мовы, але перш за ўсё трэба ведаць сваю родную мову, бо яна з′яўляецца адным з самых вялiкiх здабыткаў кожнага народа». У ходзе гульні вучні развівалі сваё творчае мысленне, вуснае маўленне, узбагачалі свой слоўнікавы запас, далучаліся да багатай мастацкай спадчыны беларускага народа.Удзельнікі мерапрыемства, узрушаныя духам спаборніцтва, панеслі з сабою жаданне гаварыць па-беларуску.
У гэты ж дзень была аформлена выстава дзіцячых малюнкаў “Малюем ілюстрацыі да твораў”.
19 лютага для вучняў школы праводзілася мерапрыемства на нямецкай мове “Was? Wo? Wann?”
20 лютага вучні ўдзельнічалі ў конкурсе “Буслік”.
21 лютага класа праведзена акцыя “Размаўляй, пішы, твары па-беларуску” дэвізам якой сталі словы Яўгеніі Янішчыц:
Сто гадоў шукай другой красы,
А тым больш, што свет даўно не вузкі!
...Ды калі ты не бязродны сын —
Гавары са мной па-беларуску!
Удзельнікам акцыі патрэбна было выцягнуць з кошыка слова на рускай мове і назваць яго па-беларуску. У гэты ж дзень прайшоў конкурс чытальнікаў вершаў “Гучы, роднае слова!”Удзельнікамі конкурса былі вучні пачатковых класаў.
Нам у спадчыну засталася ўнікальная мова – жывая і мілагучная, песенная і паэтычная, старажытная і сучасная. А што казалі беларускія славутыя класікі аб роднай мове? На гэта пытанне адказалі вучні 8 класа, якія падабралі выказванні беларускіх пісьменнікаў пра родную мову. У апошні дзень тыдня вучні зрабілі калаж “Майстры слова пра мову”.
Тыдзень філалогіі прайшоў ярка і запамінальна і нікога не пакінуў абыякавым. Галоўнае, што вучні зразумелі: трэба часцей слухаць беларускую мову і гаварыць на ёй, чытаць беларускамоўныя кнігі і берагчы спадчыну.